Sabiq prezident Yanukoviçin həbs olunması üçün məhkəmə qərar verdi

Ukraynanın başkəndi Kiyevin Peçersk rayon məhkəməsi ölkənin sabiq prezidenti Viktor Yanukoviçin və Daxili İşlər Nazirliyinin keçmiş rəhbəri Vitali Zaxarçenkonun “kilsə işi” üzrə həbsi barədə qərar çıxarıb. Bu barədə “112 Ukrayna” telekanalı açıqlama yayıb.  Telekanalın reportajında bildirilir ki, məhkəmə Baş Prokurorluğun müstəntiqinin vəsatəti əsasında Yanukoviç və Zaxarçenkonu həbs etməyə razılıq verib. Bu, həmçinin Kiyev milisinin keçmiş rəisi Valeri Koryaka da aiddir. Müstəntiqin sözlərinə görə, şübhəli şəxslər istintaqdan və məhkəmədən gizlənirlər. Onları saxlamaq və hüquqi tədbirlər görmək üçün məhkəməyə gətirmək lazımdır.

Qeyd edək ki, Zaxarçenko, Yanukoviç və Koryak Ukraynanın pravoslav kilsəsinin nümayəndəsi Aleksandr Drabinkonun azadlıqdan qanunsuz məhrum edilməsində şübhəli bilinirlər. İstintaqın məlumatına görə, Yanukoviç və onun ətrafı mərhum mitropolitə vəzifəsindən uzaqlaşmaq üçün təzyiq göstəriblər.

Xudaferin.eu
Ukrayna, “Kiyev Bürosu”

13:30