Rusiya Baş Prokurorluğu rusiyalı telejurnalist Svetlana Kulçitskayanın Azərbaycan əleyhinə olan filminin ekstremist xarakterli olub-olmadığını araşdırır.

APA-nın Moskva müxbirinin verdiyi məlumata görə, Moskva vilayəti Azərbaycanlılarının Regional Milli Mədəni Muxtariyyətinin üzvü Həşim Əliyevin telejurnalist Svetlana Kulçitskayanın "Qayıdış" filminin ekstremist xarakterdə olub-olmamasının araşdırılmasına dair müraciəti baxılması üçün Rusiya Federasiyası Baş Prokurorluğunun federal təhlükəsizlik, millətlərarası münasibətlər, ekstremizm və terrorçuluğa qarşı əks-fəaliyyətə nəzarət İdarəsinin böyük prokuroru İ.V. Volxonskaya tərəfindən Sankt-Peterburq prokurorluğuna göndərilib.

Qeyd edək ki, Dağlıq Qarabağda 90-cı illərdə gedən müharibədən bəhs edən, rusiyalı telejurnalist Svetlana Kulçitskayanın hazırladığı “Qayıdış” adlı sənədli film Ermənistan Respublikasının maliyyə dəstəyi ilə çəkilib. Filmdə tarixi Azərbaycan əraziləri Şərqi Ermənistan adı altında göstərilir. Dağlıq Qarabağda ermənilərin 90-cı illərdə müharibə zamanı ordusuz, blokada şəraitində öz "müstəqilliyi" və "azadlığı" uğrunda mübarizə aparmasından bəhs edilir.

Xatırladaq ki, film bu il martın 11-də Rusiyadakı erməni diasporu tərəfindən Moskvanın Vasilyevskaya küçəsində yerləşən Kino Evində nümayiş olunub. /APA/