Soydaşlarımız Kiyevdə ATƏT-in ofisinin qarşısında etiraz aksiyası keçiricəklər

 

 

Ukraynada fəaliyyət göstərən Ukrayna Azərbaycanlı Gənclər Birliyi ATƏT-in Kiyevdəki ofisinin qarşısında Azərbaycan torpaqlarını işğal edən Ermənistan silahlı qüvvələrinin növbəti təxribatına etiraz əlaməti olaraq aksiya keçirəcəklər.

 

Aksiyanın keçirilməsində məqsəd Ermənistan silahlı qüvvələri tərəfindən Azərbaycanın işğal olunmuş bölgələrində quldurluq fəaliyyətinin davamı kimi Füzuli rayonunun Alxanlı kəndinin dinc sakinlərinin atəşə tutulması, Sahibə Allahverdiyevanın (Quliyeva) və iki yaşlı nəvəsi Zəhra Quliyevanın həlak olması ilə bağlı yerli ictimaiyyəti, siyasi çevrələri, vətəndaş cəmiyyətini məlumatlandırmaq, dünya birliyini Ermənistan dövlətinin Azərbaycanın işğal olunmuş torpaqlarında özbaşınalığına son qoymağa çağırmaqdır.

Etiraz aksiyası ilə bağlı icazənin alınması üçün artıq Ukraynanın müvafiq dövlət orqanlarına müraciət olunub. Aksiyada Azərbaycan ərazilərini işğal altında saxlayan Ermənistan dövlətinin təcavüzkarlıq siyasətinə etiraz ifadə edən şüarlar səsləndiriləcək. Aksiya iştirakçıları təcavüzkar Ermənistana qarşı sərt sanksiyaların tətbiqi üçün beynəlxalq təşkilatlara müraciət etməyi planlaşdırırlar. Qeyd edək ki, Ukraynada yaşayan azərbaycanlı gənclərlə yanaşı, diaspor təşkilatlarının nümayəndələrinin də etiraz aksiyasında iştirakı nəzərdə tutulur.

Xudaferin.eu
Ukrayna, “Kiyev Bürosu”

11:05