“Azərxalça” ASC-nin Füzuli rayon filialında qədim “Əjdahalı” çeşnisi əsasında daha bir xalça toxunaraq təhvil verilib.

“Azərxalça” ASC-dən bildirilib ki, 404x276 sm ölçülü yun xalça, xalça ustaları- Gülnarə Hacıyeva, Nərmin Nəbiyeva, Röya Abbasova və Məxluqə Abbasovanın zəhməti sayəsində dörd ay müddətində ərsəyə gəlib.

Qeyd edək ki, XVI-XIX əsrlərdə “Əjdahalı” çeşnisinin bədii-texnoloji baxımdan inkişafında Azərbaycan xalçaçılığının rolu danılmazdır. Bu klassik çeşni tarixi “bünövrə” rolunu oynamaqla yanaşı, eyni zamanda, yerli və yeni meyilləri əks etdirməyə başlayıb.

Əsasən XVII-XVIII əsrlərdə toxunan bu xalçanın qədim nümunələrinə dünyanın məşhur incəsənət muzeylərində və şəxsi kolleksiyalarda rast gəlmək mümkündür və milli xalçaçılığımızda bu çeşninin varisi “Çələbi” kimi tanınan Qarabağ xalçasıdır.

Xudaferin.eu