Qırğızıstanın başkəndi Bişkekdə III “TENGRI Music 2017” Beynəlxalq Klassik Musiqi Festivalı keçirilib. Tədbir “Prima” İctimai Fondu, Qırğızıstanın Prezident Aparatı, Mədəniyyət, İnformasiya və Turizm Nazirliyi və Bişkek şəhər meriyası tərəfindən təşkil olunub. Festivalda ABŞ, Avstriya, Tatarstan, Başkortstan, Çuvaşstan, Saxa (Yakutiya), Tuva, Xakasiya, Dağlıq Altay, Yunanıstan, Türkiyə, Azərbaycan, Qazaxıstan və Qırğızıstanın tanınmış musiqiçiləri iştirak ediblər.

Azərbaycanı bu uluslararası festivalda əməkdar artist, Dövlət Akademik Opera və Balet Teatrının dirijoru Əyyub Quliyev və opera müğənnisi Çinara Şirin təmsil edib. Festivalın bağlanış mərasimində Əyyub Quliyevin dirijorluğu ilə A.Cumaxmatov adına Qırğızıstan Dövlət Akademik Simfonik Orkestri böyük uğurla çıxış edib. Konsertin proqramında maestro Niyazinin əsərləri ilə yanaşı, V.A.Mosart, C.Rossini, C.Verdi, C.Puççini, K.Sen-Sans, J.Bize, F.Leqar, E.Kurtis, C.Gerşvinin instrumental və vokal əsərləri yer alıb. Əsərləri Ankara Dövlət Opera Teatrının solisti Umut Kosman (bariton), Bişkek Opera Teatrının solistləri Sayan İsin (tenor), Tair Beyşeyev (bas), Qırğızıstanın Əməkdar Artisti Elnura Samarbekova (soprano) və Çinara Şirin (metso-soprano) ifa ediblər. Böyük marağa səbəb olan konserti açıq səma altında 10000-dək insan izləyib. Tamaşaçıların sayı Qırğızıstanda keçirilən musiqi layihələri sırasında rekord kimi qeydə alınıb. İzdihamlı konsertin sonunda dinləyicilər beynəlxalq vokalçılar qrupunu, azərbaycanlı dirijoru və Qırğızıstan Dövlət Simfonik Orkestrinin musiqiçilərini ayaq üstə alqışlayıblar.

Xudaferin.eu
Qırğızstan, “Bişkek Bürosu”