Gələn il Azərbaycan və Özbəkistan arasında ümummilli lider Heydər Əliyevə həsr olunmuş beynəlxalq layihələr həyata keçiriləcək

Özbəkistandakı Heydər Əliyev adına Azərbaycan Mədəniyyət Mərkəzinin direktoru Samir Abbasov ilə Türk Tarixi və Mədəniyyəti Fondunun rəhbəri Nizamettin Aykurt arasında görüş keçirilib.

Mərkəzdən AZƏRTAC-a bildirilib ki, görüşdə türk tarixi və mədəniyyətinin təbliği istiqamətində birgə layihələrin həyata keçirilməsi, təşkilatlar arasında əməkdaşlıq məsələləri müzakirə olunub.

Samir Abbasov bu il noyabrın 10-11-də Özbəkistanın Səmərqənd şəhərində keçirilən türk dövlətləri başçılarının Sammitinin əməkdaşlıqda yeni imkanlar açdığını və bu tədbir çərçivəsində bir sıra mədəniyyət tədbirlərinin keçirildiyini, gələcəkdə isə yeni əməkdaşlıq platformasının yarandığını qeyd edib. Diplomat 2022-ci ilin Azərbaycan Respublikasının Prezidenti İlham Əliyev tərəfindən “Şuşa İli” elan olunması, bu istiqamətdə keçirilən tədbirlər, layihələr barədə danışıb, Azərbaycanın Türk dünyası ilə, Özbəkistanla mədəni əlaqələrin inkişafına xüsusi önəm verdiyini qeyd edib.

Mərkəzin direktoru ilin sonunadək Özbəkistanda istiqlal şairlərimiz Əhməd Cavad, Abdulla Aripov və Mehmet Akif Ersoya həsr olunmuş beynəlxalq konfrans, sözügedən şairlərin əsərləri əsasında Özbəkistan xalq çalğı alətləri Ansamblının hazırladığı konsert proqramı və Əhməd Cavadın Özbək dilinə tərcümə olunmuş şeirlər kitabının təqdimatının keçiriləcəyini bildirib və sözügedən layihəyə Türk Tarixi və Mədəniyyəti Fondunun qoşulmasını təklif edib.

Samir Abbasov Azərbaycan Mədəniyyət Mərkəzinin təşəbbüsü və layihəsi ilə Qarabağda XIX əsrdə fəaliyyət göstərmiş “Məclisi Fəramuşan” şairlər görüşünün iki əsrdən sonra Azərbaycan və Özbəkistan arasında bərpa olunduğunu qeyd edib. Diplomat 2023-cü ilin TÜRKSOY təşkilatı tərəfindən “Şuşa İli” elan olunmasını nəzərə alaraq, gələn il sözügedən şairlər məclisinin Şuşada bütün Türk dövlətlərini təmsil edən şairlərin, musiqi sənətçilərinin iştirakı ilə beynəlxalq tədbirin keçirilməsinə dəstək xahiş edib. Bundan başqa, “Səmərqənd Türk sivilizasiyasının paytaxtı”, habelə 2023-cü il “Heydər Əliyev İli” elan olunması ilə əlaqədar birgə layihələrin həyata keçirilməsi müzakirə edilib.

Görüşdə təşəkkürünü bildirən Türk Tarixi və Mədəniyyəti Fondunun rəhbəri Nizamettin Aykurt rəhbərlik etdiyi Fondun əsas məqsədinin geniş coğrafi əraziyə yayılaraq böyük sivilizasiya yaradan türk xalqlarının mədəni irsinin beynəlxalq aləmdə təbliği, qorunması və gələcək nəsillərə çatdırılması olduğunu qeyd edib. O, Türk Dövlətləri Təşkilatının Səmərqənd Sammiti çərçivəsində Fond tərəfindən “Türküstan” sərgisinin Özbəkistanın Turizm və Mədəni İrs Nazirliyi ilə birgə təşkil edildiyini vurğulayıb. Sərgidə Türk Tarixi və Mədəniyyəti Fondunun kolleksiyasından nümayiş etdirilən Türküstan xəritələrinin məşhur coğrafiyaşünaslar tərəfindən tərtib edildiyini və türk xalqlarının tarixini, onların müxtəlif coğrafiyalara yayılmasını göstərdiyini bildirib. Xəritələr sahəsində xüsusi həssaslıq nümayiş etdirilməsinin vacib olduğunu deyən Samir Abbasov dünyada bir sıra muzeylərdə yanlış xəritələrin sərgiləndiyini bildirib. O, sözügedən tarixi xəritələrin Azərbaycan və Özbəkistan muzeylərinə təqdim olunmasının xüsusi əhəmiyyət daşıdığını qeyd edib və tərəflər bu mövzuda birgə əməkdaşlığı razılaşdırıblar.

Nizamettin Aykurt Türk Tarixi və Mədəniyyəti Fondu tərəfindən yaradılan türk rəqəmsal kitabxanası barədə məlumat verərək, layihənin nəinki türk dövlətlərini, türk toplumları yaşayan digər ölkələrin də əhatə etdiyini bildirib. Samir Abbasov sözügedən layihənin əhəmiyyətini qeyd edərək, Azərbaycan kitabxanalarının layihəyə qoşulması ilə əlaqədar Azərbaycan Mədəniyyət Nazirliyi ilə məsləhətləşmələrin aparıldığını və bu istiqamətdə birgə görüş, müzakirələrin vacib olduğunu söyləyib. Nizamettin Aykurt 1872-ci ildə hazırlanmış, Avropa, Kiçik Asiya yarımadası, habelə Qafqaz ərazilərini özündə əks etdirən “Yustinian hakimiyyətinin sonlarına doğru Avropa” (eramızın 560-cı ilini əhatə edən) tarixi xəritənin surətini Samir Abbasova hədiyyə edib. Qeyd edək ki, xəritədə Qafqaz Albaniyası və Atropatena kimi Azərbaycan dövlətləri yer alıb.

Sonda Samir Abbasov Azərbaycan Mədəniyyət Mərkəzinin layihəsi ilə Azərbaycanın Qarabağ şairəsi Xurşidbanu Natəvanın və istiqlal şairimiz Əhməd Cavadın Azərbaycan-özbək dillərində nəşr olunan kitablarını Nizamettin Aykurta hədiyyə edib.

Xudaferin.eu


 

14:32