Yeni hökumət üzvlərinin parlamentdəki yerlərini kim tutacaq?

Parlamentdə (hələ ki nəzəri şəkildə) 6 deputat yeri boşdur.

Xudaferin.eu-nun oxu.az-a istinadən xəbərinə görə, millət vəkili, ölkənin birinci xanımı Mehriban Əliyevanın ötən il birinci vitse-prezident təyin edilməsi ilə bağlı onun səlahiyyətlərinə xitam verilib və həmin vaxtdan  Xəzər rayonundakı yeri boşdur.

Bununla yanaşı, bir neçə gün öncə hakim Yeni Azərbaycan Partiyasından (YAP) olan millət vəkili, professor Astan Şahverdiyev qəfildən ürəktutmasından dünyasını dəyişib və onun təmsilçisi olduğu Cəbrayıl rayonu hazırda  millət vəkilsiz qalır.

Həmçinin, ötən həftənin şənbə və bu həftənin bazar ertəsi günü ölkə Prezidenti İlham Əliyevin sərəncamları ilə Göygöldən millət vəkili Rövşən Rzayev “Qaçqınkom”un, Ucardan deputat olan və Azərbaycanın Avropa Şurası Parlament Assambleyasındakı (AŞPA) nümayəndə heyətinin sədr müavini Vüsal Hüseynov Dövlət Miqrasiya Xidmətinin rəisi, Sumqayıtdan millət vəkili seçilən Muxtar Babayev ekologiya və təbii sərvətlər naziri, Xətai rayonunun parlamentdəki təmsilçilərindən olan Milli Məclisin (MM) Gənclər və idman komitəsinin sədri Fuad Muradov Diasporla İş Üzrə Dövlət Komitəsinin sədri təyin edildikləri üçün onların da yaxın zamanlarda deputatlıq fəaliyyətlərinə xitam verilməsi gözlənilir, ən azı qanunvericilik bunu tələb edir.

Əgər həmin şəxslərin də deputatlıq fəaliyyətlərinə son verilərsə, MM-dəki deputat yerlərinin sayı rəsmən 125-dən 119-a düşmüş olacaq və həmin şəxslərin yerinə seçildikləri dairədə təkrar seçkilər təyin ediləcək.

Bu yerdə qeyd edək ki, yeni hökumətdə təmsilçilik qazanan deputatlardan bəzisi MM-də də vəzifə daşıyır.

Qeyd edildiyi kimi, F. Muradov MM-in komitə sədridir, həmçinin, Azərbaycanın “Avronest” Parlament Assambleyasındakı (PA) nümayəndə heyətində (həm də qurumun komitə sədridir) və Avropa İttifaqı-MM Əməkdaşlıq Komitəsində təmsil olunur.

R. Rzayev MM-in Hüquq siyasəti və dövlət quruculuğu komitəsinin sədr müavini, eləcə də, Azərbaycanın AŞPA və “Avronest” PA-dakı nümayəndə heyətinin üzvüdür.

V. Hüseynov Azərbaycanın AŞPA-dakı nümayəndə heyətinin sədr müavinidir.

Odur ki. həmin şəxslərin (hətta, deputatlıq fəaliyyətlərinə son verilməyəcəyi təqdirdə belə) MM-dəki vəzifələri  və beynəlxalq qurumlardakı təmsilçilikləri başqaları ilə əvəzlənəcək.

Əldə edilən məlumatlara görə, F. Muradovun MM-dəki komitə sədri vəzifəsini onun müavini Ülvi Quliyev və ya həmin komitənin üzvü Adil Əliyev davam etdirəcək. Ü. Quliyev sədr seçiləcəyi təqdirdə, onun vəzifəsinə isə A. Əliyev seçiləcək. Bununla yanaşı, F. Muradovla R. Rzayevin adıçəkilən komitədəki yerləri millət vəkilləri Eldəniz Səlimov və Azər Badamovun hesabına doldurulacaq və MM-in mayın 1-dəki iclasında bu məsələ rəsmiləşdiriləcək.

Eyni zamanda, R. Rzayevin MM-in Hüquq siyasət və dövlət quruculuğu komitəsinin sədr müavini vəzifəsinə həmin komitənin üzvü olan tanınmış hüquqşünas Çingiz Qənizadə və ya YAP-çı deputat Rafael Cəbrayılovun seçilməsi ehtimal olunur.

V. Hüseynov Azərbaycanın AŞPA-dakı nümayəndə heyətinin sədr müavini vəzifəsinə isə 3 şəxsin adı hallanır-Asim Mollazadə, Sahibə Qafarova və Sevinc Fətəliyevanın.

Eyni zamanda, millət vəkili, Demokratik Maarifçilik Partiyasının sədri Elşən Musayevin yenidən AŞPA-dakı nümayəndə heyətində  təmsilçiliyi gözlənilir.

14:14