Aygün Sabirin “Ürəyimin səsi”  ilk şeirlər kitabı Apostrof-A nəşriyyatında işıq üzü gördü

Müasir Azərbaycan poeziyasına yeni bir imza əlavə olundu. Şairə Aygün Sabirin “Ürəyimin səsi” adlı ilk şeirlər toplusu çapdan çıxıb. Müəllifin uzun illər ərzində qələmə aldığı poetik nümunələri özündə birləşdirən kitab oxuculara bir poeziya çələngi kimi təqdim olunur.

Kitaba ön sözü hüquqşünas-alim, publisist və ictimai xadim Ataxan Əbilov yazıb. Ön sözdə müəllifin poeziyaya münasibəti, şeirlərdəki səmimiyyət, mənəvi duyğuların ifadəsi və Aygün Sabirin yaradıcılıq xüsusiyyətləri xüsusi vurğulanır.

Kitabda sevgi, insan duyğuları, həyatın mənəvi çalarları, həsrət, ümid və daxili dünyaya aid müxtəlif mövzular poetik dillə ifadə edilib. Şeirlərin əsas xüsusiyyətləri onların səmimiyyəti, sadəliyi və oxucunun ruhuna yaxınlığıdır. Müəllif misralarında duyğuların təbii axarını qorumağa çalışaraq, poetik düşüncələrini içdən gələn bir üslubda təqdim edir.

Aygün Sabir Lənkəran şəhərində anadan olub. O, uşaq yaşlarından poeziyaya böyük maraq göstərib, məktəb illərində şeir qiraət ustası kimi tanınıb. Müəllifin şeirləri müxtəlif dövrlərdə dövrü mətbuatda, o cümlədən “Məşəl” və “Söz” jurnallarında dərc olunub. “Ürəyimin səsi” onun ilk kitabı olsa da, müəllifin poeziyaya bağlılığının və uzun illər formalaşmış duyğu dünyasının bədii ifadəsi kimi diqqət çəkir.

Kitabın nəşri və oxuculara təqdim olunması müəllifin yaradıcılıq yolunda mühüm hadisə kimi qiymətləndirilir. Nəşr yüksək poliqrafik keyfiyyətlə “Apostrof-A” nəşriyyatında hazırlanaraq çap olunub.

“Ürəyimin səsi” kitabı poeziyasevərlər, xüsusilə duyğu və mənəviyyat mövzusunda yazılmış şeirlərə

maraq göstərən oxucular üçün dəyərli bir nəşr hesab olunur. 

Yeni kitab münasibətilə müəllifi təbrik edir, ona yeni yaradıcılıq uğurları arzulayırıq.

Xudaferin.eu