Azərbaycan Dillər Universitetində (ADU) “Ritorika” Yeniyetmə və Gənclər Mərkəzi ilə Real Line TV-nin əməkdaşlığı çərçivəsində lentə alınmış “Qarabağ həqiqətləri uşaqların gözü ilə” filminin təqdimatı keçirilib. ADU-dan bildirilib ki, universitetin rektoru vəzifəsini icra edən professor Dünyamin Yunusov Heydər Əliyev Fondunun vitse-prezidenti Leyla Əliyevanın təşəbbüsü ilə başlanan “Xocalıya ədalət!” beynəlxalq kampaniyası çərçivəsində tədbirlərin mütəmadi keçirildiyini diqqətə çatdırıb.

Azərbaycanın inkişaf etdiyini və regionda ən qüdrətli dövlətə çevrildiyini vurğulayan professor gənclərimizin aprel döyüşlərində göstərdikləri qəhrəmanlıqlardan söz açıb. Xocalı həqiqətlərindən bəhs edənlər bildiriblər ki, tələbələr Azərbaycanın zəngin tarixini dərindən öyrənməlidirlər.
Tədbirdə digər çıxış edənlər film haqqında fikirlərini bölüşüblər. Qeyd olunub ki, filmin əsas məqsədi Azərbaycan həqiqətlərini dünya ictimaiyyətinə çatdırmaq, gənclərə vətənpərvərlik ruhunu aşılamaqdır. Sonra “Qarabağ həqiqətləri uşaqların gözü ilə” filmi nümayiş olunub. Filmin ərsəyə gəlməsində əməyi olanlara diplomlar təqdim edilib.

Xudaferin.eu