Azərbaycanın başkəndi Bakıda Respublika Sarayında görkəmli müğənnilər, xalq artistləri Fidan və Xuraman Qasımovaların yaradıcılığına həsr edilmiş tədbir keçirilib.

Öncə qonaqlar sənətkarların həyat və yaradıcılığından bəhs edən videoçarxa baxıblar.

Tədbirdə Fidan və Xuraman Qasımova bacılarının Azərbaycan musiqi mədəniyyətinin və vokal ifaçılıq sənətinin formalaşmasındakı xidmətlərindən söz açılıb. Qeyd olunub ki, onlar müxtəlif ölkələrdə keçirilən beynəlxalq müsabiqələrdə Azərbaycanın adını hər zaman öz sənətləri ilə ucaldıblar. Milli vokal ifaçılıq məktəbinin ənənələrini ləyaqətlə qoruyub yaşadan Fidan və Xuraman bacıları dünya miqyasında tanınan və qəbul olunan sənətkarlardandır.

Bildirilib ki, geniş konsert proqramları ilə dəfələrlə ABŞ, Almaniya, Böyük Britaniya, İsveç, Avstriya, Meksika, Rusiya, Fransa, İtaliya, Danimarka, Kuba, Türkiyə və dünyanın digər ölkələrində qastrolda olan Qasımova bacıları musiqisevərləri heyran qoyublar. Onlar son illər istedadlı gənclərə xeyli vaxt sərf edir, yorulmadan yeni vokalçılar nəslini yetişdirməklə məşğul olurlar. Həmin gənclərin arasında beynəlxalq müsabiqələr diplomantları və laureatları da az deyil. Azərbaycan opera sənətinin fəxri olan müğənnilərin sorağı dünyanın ən möhtəşəm salonlarından gəlir.

Tədbir iştirakçıları Fidan və Xuraman Qasımova bacılarının həyat və yaradıcılığından bəhs edən “İki inci, iki canlı tarix” adlı sənədli filmə baxıblar. Film “Yaddaş” studiyasında ekranlaşdırılıb. Sonra Qasımova bacıları maraqlı konsert proqramı təqdim ediblər. Onları Xalq Artisti Teymur Göyçayevin bədii rəhbərliyi və baş dirijorluğu ilə Qara Qarayev adına Azərbaycan Dövlət Kamera Orkestri müşayiət edib. Konsertdə opera müğənniləri repertuarlarında yer alan musiqi əsərləri ilə yanaşı, yeni kompozisiyalar da səsləndiriblər. Biri-birindən parlaq ifalar böyük tamaşaçı auditoriyası tərəfindən hərarətlə qarşılanıb.

Xudaferin.eu