Gəncə Dövlət Dram Teatrında görkəmli rus yazıçısı A.P.Çexovun “Vanya dayı” əsəri əsasında yeni tamaşa hazırlanır. Teatrın baş rejissoru İradə Gözəlovanın quruluş verdiyi tamaşada Gəncə Teatrının aparıcı aktyorları çıxış edəcək.

İradə Gözəlovanın sözlərinə görə, tamaşanın hazırlıq prosesi xeyli vaxt aparıb: “Ümid edirəm ki, maraqlı əsər alınacaq. Aktyorlar rol üzərində həvəslə çalışır. Hazırlıq prosesinə xeyli vaxt sərf etdik. Tamaşa dekorlar və kostyumların hazırlanmasına görə, bir az yubandı. İyunun sonunda tamaşanın daxili baxışını keçirəcəyik. Premyera isə iyulun əvvəlində olacaq. Çox güman ki, Gəncə Teatrı mövsümü “Vanya dayı” tamaşasının premyerası ilə yekunlaşdıracaq. Bildiyiniz kimi “Vanya dayı” A.P.Çexovun məşhur və çox oxunan əsərlərindən biridir. Amma mənim quruluş verəcəyim “Vanya dayı” öz hisslərimi, həyəcanımı ifadə edəcək. Çexovun vasitəsilə şəxsi düşüncəmdə olan “Vanya dayı”nı səhnəyə gətirəcəm.”

Yeni tamaşada əsas obrazları xalq artisti Alim Məmmədov, əməkdar artistlər Ramiz Vəliyev, Novruz Cəfərov, İlham Hüseynov, aktyorlar Rəhilə Məmmədova, Kəmalə Məmmədova, Sevinc Hüseynova, Mətləb Təhmasi və başqaları ifa edəcək. Tamaşanın premyerası iyulun 15-də nümayiş olunacaq. Gəncə Dövlət Dram Teatrı “Vanya dayı” tamaşası ilə teatr mövsümünü başa çatdıracaq.
 

Hicran Məmmədova

Gəncə