Portfelsiz nazirin xaricdəki gizli əmlakları müsadirə olunub!

Bu yaxınlarda portfelsiz nəqliyyat naziri Ziya Məmmədovun xaricdə daha bir neçə çox qiymətli daşınmaz əmlakı fiksə olunub və “müsadirə” edilib. Ziya Məmmədovun ətrafında belə “əməliyyat-axtarış” tədbirləri 3-4 ildir ki, davam edir. Ən populyar versiyaya görə, Ziya Məmmədov 2013-cü ilin Prezident seçkiləri ərəfəsindəki xəyanətkar davranışlarına görə hakimiyyətin qəzəbunə tuş gəlmiş baş nazirin sabiq birinci müavini Abbas Abbasovla gizli əlaqələrinə görə cəzalandırılır. Onun Azərbaycandakı və xaricdəki bütün biznesinə “əl qoyuldu”, ətrafı təmizləndi, əksər səlahiyyətləri əlindən alındı və 2-3 il davam edən bu “budama prosesi”nin sonunda bu ilin fevral ayında Nəqliyyat Nazirliyi Rabitə və İnformasoya Texnologiyaları Nazirliyinə birləşdirilməklə, Z.Məmmədovun formal nazir statusuna da son verildi. Vəzifəsini itirdikdən sonra Ziya Məmmədovun doğulduğu Ucar rayonundakı malikanəsinə qapıldığı, hətta dini mütaliə ilə məşğul olduğu bildirilib.

Lakin belə görünür ki, nə Ziya Məmmədov mal varlığı ilə bağlı tam dolğun məlumatları təqdim edib, nə də ona inanıblar. Bu üzdən sabiq nazirin ətrafında kəşfiyyat fəaliyyətinə də son verilməyib. Elə davam edən bu fəaliyyət nəticəsində də Z.Məmmədovun vaxtilə soyad eyniliyi təşkil etməyən uzaq qohumlarının adına xaricdə bir neçə bahalı daşınmaz əmlak aldığı da müəyyənləşdirilib. Həmin şəxslər və onların adına olan əmlaklar təsbit edilib və səssizcə “müsadirə edilib”.

Məlumata görə, Ziya Məmmədovun uzaq qohumları ilə “profilaktik söhbətlər” müsbət nəticələnib və onlar adlarına olan əmlakı səssizcə təhvil verməyə razılaşıblar. Bundan sonra həmin əmlaklar hökumətdəki qüdrətli şəxsin yaxınlarının adına keçirilib.

AzPolitika.info