Yasamalın "Qoçu Əsgər"i İbrahim Mehdiyevə prezidentdən sərt etiraz

 

İlham Əliyevin göstərişi ilə "Ovçular evi" ərazisində yaşayış binasının tikintisi dayandırıldı
 

Yasamal rayon İcra Hakimiyyətinin başçısı İbrahim Mehdiyevin son bir ay ərzində artıq 4-cü "ÇP"si üzə çıxdı, Prezident işə qarışdı... "Sovetski" ərazisində insanların yaşadığı 14 mərtəbəli yaşayış binasının sökülməsinə cəhdin ardınca, İbrahim Mehdiyevin iki gün əvvəl jurnalist xanıma əl qaldırması, dünən isə məşhur məscidin özbaşına sökülməsinə cəhd, bu gün isə çoxsaylı ağacların kəsilib yerində yaşayış binası tikilməsi... İnsanlar başçıya etiraz edərək kütləvi ayağa qaldırılır. Niyə? Siyasi-ictimai sabitliyi pozmaq kimə lazımdır? Nədir, İbrahim Mehdiyev şəhərin "Qoçu Əsgər"idir? İş o yerə çatdı ki, son iki hadisəyə Prezident İlham Əliyev özü qarışdı... Özü də indiki qayğılı vaxtında... Sonra da deyirlər ki, Prezident filankəsi niyə sərt cəzalandırdı, işdən qovdu???

İbrahim Məmmədov işdən çıxarılacaq?

 

Prezident İlham Əliyevin göstərişi ilə bu gün Yasamal rayonu, Mətbuat prospektində yerləşən "Ovçular evi" ərazisində yaşayış binasının tikintisi dayandırılıb. Prezidentin Mətbuat Xidmətindən verilən məlumata görə, buna səbəb tikinti aparan şirkət tərəfindən ərazidəki 54 ağacın qanunsuz olaraq kəsilməsi və ərazidəki yaşıllığın tamamilə məhv edilməsidir. Tikinti yerindəki məlumat lövhəsinə görə, Yasamal rayonunda qeyd olunan ünvanda “Böyük Plaza” yaşayış və ticarət mərkəzinin tikintisi aparılırdı. Lakin tikintini həyata keçirən şirkət mövcud qanunları pozaraq ərazidə ağacları qanunsuz olaraq ağır texnika ilə məhv edib. Məsələ ətraf binalarda yaşayan sakinlərin ciddi narazılığına səbəb olub. Ərazidə aparılan tikinti zamanı yol verilmiş qanunsuzluqlar və ağacların kəsilməsinə ölkə prezidenti İlham Əliyev kəskin reaksiya göstərmiş, tikinti işlərinin dərhal dayandırılması və məsələnin nəzarətə götürülərək araşdırılması barədə göstəriş verib. Yasamal rayonu, Mətbuat prospektində əraziyə baxış keçirən Ekologiya və Təbii Sərvətlər Nazirliyi ağacların məhv edilməsi barədə akt tərtib edib və yaşayış binasının tikintisini həyata keçirən şirkət 130 min manat məbləğində cərimələnib və fakt üzə cinayət işi açılıb. Ölkəmizdə yaşıllıqların salınması, ekoloji vəziyyətin yaxşılaşdırılması üçün tədbirlərin görülməsi, qanunsuz ağac kəsilmələrinə qarşı müxtəlif tədbirlər aparılması, ağacəkmə aksiyalarının keçirilməsinə baxmayaraq, mövcud yaşıllıqların məhv edilməsi, ağacların qanunsuz kəsilməsi təbii ki yolverilməzdir.

Prezident İlham Əliyev ağacların qanunsuz olaraq kəsilməsinin yolverilməz olduğunu və bu qanunsuzluqlara qarşı daim ciddi tədbirlər görülməli olduğunu, belə hallara yol verən şəxslərin məsuliyyətə cəlb edilməli olduğunu bildirib:

Prezident İlham Əliyevin ağackəsimi ilə bağlı çıxışından sitat: (13 aprel 2014, Nazirlər Kabinetinin iclası, yekun nitqi) "Biz ekoloji vəziyyətlə bağlı məsələləri daim diqqət mərkəzində saxlayırıq. Ancaq ictimaiyyəti də, məni də narahat edən məsələ ağacların kəsilməsi məsələsidir. Buna yol vermək olmaz. Hesab edirəm ki, biz burada daha da ciddi məsuliyyət tətbiq etməliyik. Ağackəsmə tam şəkildə dayandırılmalıdır. Ancaq nadir hallarda, o da Ekologiya və Təbii Sərvətlər Nazirliyinin rəyi ilə haradasa ağac ya köçürülə, ya kəsilə bilər. Ona görə mən dəfələrlə bu məsələlərlə bağlı öz fikrimi bildirmişəm. Deyə bilərəm ki, vəziyyət əvvəlki illərə nisbətən daha da müsbətdir. Ancaq biz istədiyimizə tam şəkildə nail ola bilməmişik. Gecə vaxtı gəlirlər, qanunsuz olaraq ağacları kəsirlər, yerləri düzəldirlər ki, ev tiksinlər. Bu, vicdansızlıqdır, bu, biabırçılıqdır, bu, cinayətdir. Ona görə aidiyyəti qurumlar təklif versinlər, biz ağacları kəsənlərə qarşı daha da ciddi tədbir görməliyik. Onlar məsuliyyətə cəlb edilməlidir. Bir daha demək istəyirəm ki, şəhərdə bir dənə də olsun ağac Ekologiya və Təbii Sərvətlər Nazirliyinin icazəsi, rəyi olmadan kəsilə bilməz. Bu, mənim son xəbərdarlığımdır”.

Yəqinki bu hallar ciddi araşdırılacaq, günahkar cəzalandırılacaq. Axı nə qədər tikmək olar?
 

Azad
Tezadlar.az

 

15:55