ATƏT-in Demokratik Təsisatlar və İnsan Haqları Bürosu və AŞPA müşahidəçiləri ötən gün Türkiyədə keçirilən Ana Yasa islahatlarına dair referendumla bağlı gözlənilən hesabatını açıqlayıblar: "MSK-nın möhürsüz bülletenlər haqqındakı qərarı qanunla bağlı əhəmiyyətli bir zəmanəti aradan qaldırdı" ifadəsinin yer aldığı hesabatda bildirilir ki, "referendum ümumilikdə Avropa Şurası standartlarına uyğun deyil".

ATƏT və AŞPA mütəxəssislərindən ibarət Konstitusiya referendumu müşahidə missiyası tərəfindən təşkil olunan mətbuat konfransında əsasən bunlar vurğulanıb:

— Ana Yasa referendumu qeyri-bərabər şərtlər altında keçirilib;

— Səslərin sayılması prosesində son anda edilən dəyişikliklər vacib olan etibarı aradan qaldırıb;

— Ziyarət etdiyimiz məhdud sayda seçki məntəqəsindəki qutular referendum günündə qaydalara uyğun idi;

— Ümumilikdə, referendum standartları tətbiq olunmadı, hüquqi çərçivə demokratik bir prosesin həyata keçirilməsi üçün qeyri-kafi idi.
 

Birgə hazırlanan hesabatda həmçinin bildirib:

— Ana Yasa referendumunda icra orqanları "EVET" kampaniyasının lehinə qanunsuz təbliğat aparıb;

— Təşviqat kampaniyası zamanı media resurslarında tərəflərə bərabər imkanlar yaradılmayıb. MSK-nın tərəfsiz mövqe tutmaq səlahiyyəti ortadan qaldırılıb;

— Ana Yasa referendumu uluslararası standartlardan geri qalıb;

— MSK-nın möhürsüz bülletenlər haqqında qərarının əhəmiyyətli olan etibarı aradan qaldırdığı və qanuna zidd olduğunu söyləyə bilərik.

ATƏT-ın Türkiyədəki referendumla bağlı müşahidə missiyasının rəhbəri Sezar Florin Predanın yaydığı bəyanatda həmçinin qeyd edilib ki, referendumun texniki aspektləri yaxşı təşkil edilsə də, islahatların əsas aspektləri, fundamental azadlıqların məhdudlaşdırılması və mümkün mənfi effektlərlə bağlı ictimaiyyətə tərəfsiz məlumatlar verilməyib. ATƏT missiyası qeyd edib ki, referendumda bəzi regionlar istisna olmaqla, böyük problemlər yaşanmayıb. "Lakin seçki məntəqələrində vətəndaş cəmiyyətinin nümayəndələrinin olmaması təəssüf doğurur" — hesabatda vurğulanır. Müşahidə missiyasının qənaətincə, ölkədəki referendum ərəfəsi durum hakimiyyətin xeyrinə olub: "Fövqəladə vəziyyət mediada siyasi partiyaların və bitərəflərin mövqeyinin tərəfsiz şəkildə işıqlandırılmasına imkan verməyib".

Xudaferin.eu
“Avropa Bürosu”