Belarusun Akademik Dövlət Opera və Balet Teatrında J.Bizenin “Karmen” operası böyük uğurla ifa olunub. Möhtəşəm səhnə əsərinin ifasında Azərbaycan və Belarusun tanınmış ifaçıları iştirak ediblər. Operaya Azərbaycanın əməkdar artisti Akademik Dövlət Opera və Balet Teatrının dirijoru Əyyub Quliyev rəhbərlik edib.

Karmen rolunu isə Belarus səhnəsində Azərbaycanın xalq artisti, tanınmış opera müğənnisi Fidan Hacıyeva canlandırıb. Digər rolları Belarusun xalq artistləri Anastasiya Moskvina, Vladimir Qromov, beynəlxalq müsabiqələr laureatları Aleksey Mikutel, Dmitriy Trofimuk, Yelena Sinyavskaya, Tatyana Petrova, Yanoş Nelepa, Aleksandr Jukov və Aleksandr Krasnodubskiy ifa ediblər.
Belarus Akademik Opera Teatrında repertuarın ən baxımlı tamaşalarından olan “Karmen” operasının quruluşçu rejissoru Qanila Danilevskaya, quruluşçu rəssamı Anna Kontek, quruluşçu dirijoru Andrey Qalanov və xormeysteri Nina Lomanoviçdir. Anşlaqla keçən operanın ifası böyük maraqla qarşılanıb və ölkənin müxtəlif bölgələrindən gəlmiş musiqi həvəskarlarının diqqətinə səbəb olub.

Sonda Azərbaycan və Belarus ifaçıları səhnəyə dəfələrlə dəvət olunub və sürəkli alqışlarla qarşılanıblar. Tamaşa bitdikdən sonra Belarus Akademik Opera və Balet Teatrının baş direktoru Vladimir Qridyuşko dirijor Əyyub Quliyev və metso-soprano Fidan Hacıyevaya öz təşəkkürünü bildirib və iki ölkənin müştərək sənət birliyinin xüsusi əhəmiyyətini qeyd edib.

Azərbaycan və Belarus Akademik Opera teatrları arasında imzalanmış memoranduma əsasən iki teatrın solistləri və dirijorları qısa müddət ərzində həm Minskdə, həm də Bakıda uğurlu və yaddaqalan çıxışları ilə ölkələr arasında mədəni əlaqələrin inkişafına yüksək təkan veriblər.

Xudaferin.eu
Belorus, “Minsk Bürosu”