Qazaxıstan prezidenti Nursultan Nazarbayev Dağlıq Qarabağ münaqişəsinin həllində vasitəçi rol oynaya bilər. ötən həftə Nursultan Nazarbayevin münaqişənin həlli ilə bağlı yeni təşəbbüslər hazırlayacağı haqda informasiya yayıldı. Nazarbayevin belə bir təşəbbüsü Astanada keçirilən Suriya görüşündən sonra gündəmə gəlməsi təsadüfi deyil. Ehtimal etmək olar ki, ATƏT-in Minsk qrupundan kənarda, Türkiyə, Rusiya, eləcə də İranın iştirakı ilə Astanada Qarabağ görüşü keçirilsin.

Erməni siyasi şərhçi Pavel Dallakyanın dedikləri də bu kontekstdə diqqət çəkir. Dallakyan hesab edir ki, Astanada Suriya danışıqları Dağlıq Qarabağ üçün yeni presedent yaratdı: “Mümkündür ki, ATƏT-in Minsk qrupu arxa plana keçirilsin və Rusiyanın vasitəçiliyi ilə Qarabağ üçün Astana görüşü təşkil edilsin”.
Bu situasiya Ermənistanda ciddi təşviş yaradıb. Xüsusilə Kollektiv Təhlükəsizlik Müqaviləsi Təşkilatı (KTMT) və Avrasiya İqtisadi İttifaqında Ermənistanla birlikdə təmsil olunan Qazaxıstanın bu mövqeyi erməniləri hiddətləndirir. Ermənistan parlamentinin deputatı Tevan Poqosyan “Nazarbayev bunun üçün İrəvandan icazə almalıdır” kimi isterik açıqlama verib.
“Bu gün Nazarbayevin Azərbaycanla bağlı mövqeyi və Bakıya dəstəyi açıq şəkildə görünür. Buna görə də onun Qarabağ məsələsində vasitəçi olma istəyinin Ermənistanda qəbul edilməyəcəyi məlumdur”, - deyə o bildirib.
Qeyd edək ki, N.Nazarbayev KTMT-də və Avrasiya İqtisadi İttifaqında Qarabağ münaqişəsi ilə bağlı Azərbaycanın mövqeyini dəfələrlə müdafiə edib.

Xudaferin.eu
Qazaxstan, “Astana Bürosu”