Fransanın Kolmar şəhərində “Mandoline et Guitar colmariennes” assosiasiyasının təşkilatçılığı ilə konsert keçirilib.

Konsertdə azərbaycanlı bəstəkar və müğənni İlahə Ahui Maestro Niyazinin “Arzu”, Tofiq Quliyevin “Arzular”, “Sevgilim” və Franz Schuberin “Ave Maria” mahnılarını ifa edib. Kiçik yaşlarından xor solisti olan İlahə Ahui Bakıda piano məktəbinə gedib. On iki yaşında Bakı haqqında ilk mahnısını bəstələyib. 1999-cu ildə Fransanın Strasburq şəhərinə gələn İ.Ahui bir il sonra Kolmar şəhərinə köçüb və orada yaşayır.

2012-ci ildə Kolmar şəhərinin Konservatoriyasının dirijorluq və vokal sinfinə daxil olub. Yerli xor qruplarına dirijorluq edib, Azərbaycan mahnılarını və öz bəstələrini səsləndirib. Hazırda azərbaycanlı dirijor və müğənni iki xor qrupu və bir orkestrə rəhbərlik edir. İlahə Ahui 2018-ci ildə Kolmar şəhərində keçiriləcək Klassik Musiqi Festivalında Azərbaycan bəstəkarlarının musiqilərini səsləndirəcək.

Xudaferin.eu
“Avropa Bürosu”