Azərbaycan Dövlət İnformasiya Agentliyinin (AZƏRTAC) və Azərbaycan-Ukrayna Beynəlxalq Alyansının birgə təşəbbüsü ilə fevralın 25-dən Kiyev şəhərinin mərkəzində - Müstəqillik Meydanında Xocalı soyqırımının 25-ci ildönümü ilə əlaqədar banner yerləşdirilib.

Bannerdə Azərbaycanın üçrəngli bayrağı fonunda “Ana harayı” heykəlinin eskizi yer alıb. Belə bir aksiyanın həyata keçirilməsinin məqsədi Xocalı soyqırımı haqqında həqiqətləri dünya ictimaiyyətinə çatdırmaqdır. Xatırladaq ki, 1992-ci il fevralın 25-dən 26-na keçən gecə Ermənistan silahlı birləşmələri Azərbaycanın Xocalı şəhərində soyqırımı törədib. Bu kütləvi qırğın nəticəsində 613 nəfər, o cümlədən 106 qadın, 63 uşaq, 70 qoca amansızlıqla qətlə yetirilib, 487 nəfər şikəst olub, 1275 dinc sakin girov götürülüb.

Ukraynanın paytaxtı Kiyev şəhərində Xocalı Faciəsi ilə bağlı mərkəzi küçəlrədə və prospektlərdə bannerlərin yerləşdirilməsi məsələsində şəhər meriyası da dəstək veribdir. Ukrayna hökuməti, vətəndaş cəmiyyəti təşkilatları, eləcə də siyasi partiyaları da etiraf edirlər ki, Qarabağın 25 il öncə Ermənistan tərəfindən işğalı siyasətinin aparılması məsələsinə çox təəssüflər olsun ki, bir zamanlar biganəlik nümayiş etdiriblər. Bu gün Ukraynada yaşanılan separatizm siyasətinin nəticəsində ölkənin büdcəsinə milyardlarla dollar zərər vurulur. Ölkənin ərazi bütünlüyü tamamilə təhdid altındadır. Buna görə də indi Azərbaycan dövlətini və xalqını daim müdafiə etməyə hazırdırlar.

Xudaferin.eu
Ukrayna, “Kiyev Bürosu”