Azərbaycanın Fransadakı Diasporunun rəhbəri koronavirusa yoluxdu

Xudaferin.eu xəbər verir ki, bu barədə Fransada yaşayan azərbaycanlı Mirvari Fətəliyevanın özü məlumat verib.

O bildirib ki, özündə bir neçə gün əvvəl halsızlıq və mədə ağrısı hiss edib. Bundan sonra o, həyat yoldaşının baş həkim işlədiyi Parisdəki xəstəxanada test verib. Onun verdiyi testin nəticəsi müsbət çıxıb.

Hazırda M.Fətəliyevada yalnız təngnəfəslik müşahidə edilir. Hərarəti yüksək dərəcədə olmadığından həmyerlimizin səhhəti normaldır və özünü yaxşı hiss edir.

Fransa Avropada İtaliya, İspaniya və Almaniyadan sonra ən çox koronavirusun yayıldığı ölkədir. Son məlumata görə, bu ölkədə 25 233 adamda koronavirus aşkarlanıb. Bunlardan 3900 adam sağalıb, 1331 nəfər ölüb.

P.S. Avropada "Azərbaycanın Dostları" Cəmiyyəti misilsiz xidmətləri olan, diaspor işlərində hər zaman yüksək vətənpərvərlik mövqeyi sərgiləyən, və gərgin ictimai əmək sərf edən Mirvari Fətəliyeva Allahdan şəfa arzulayır, işinin başına qayıtmağını ulu Tanrıdan diləyirik.

xudaferin.eu

14:43