Azərbaycan Vətən müharibəsində qazandığı hərbi-siyasi Qələbəni regionda yeni iqtisadi reallıqlar formalaşdırmaqla davam etdirir

Azərbaycan Vətən müharibəsində qazandığı hərbi-siyasi Qələbəni regionda yeni iqtisadi reallıqlar formalaşdırmaqla davam etdirir.

Bunu  ​Xudaferin.eu AZƏRTAC-a istinadən açıqlamasında Milli Məclisin deputatı Ramin Məmmədov bildirib.

Deputat deyib ki, yanvarın 11-də Moskvada Azərbaycan, Rusiya və Ermənistan rəhbərləri arasında keçirilmiş üçtərəfli görüş Cənubi Qafqazın iqtisadi mənzərəsini, nəqliyyat xəritəsini yeni reallıqlar əsasında formalaşdırmağa xidmət edir. Görüşün ən mühüm nəticəsi kimi qiymətləndirilən birgə Bəyanat nəinki imzalayan tərəflərin, eləcə də bütün region ölkələrinin qarşısında yeni iqtisadi perspektivlər açır.

Ramin Məmmədov vurğulayıb ki, Azərbaycanın qalib ölkə kimi qatıldığı bu görüşdə əldə olunmuş razılaşma regionda davamlı sülh, sabitlik və rifah üçün əməkdaşlığın zəruriliyini bir daha təsdiqləyir. Azərbaycan öz ərazi bütövlüyünü bərpa edib. Bu, əlbəttə ki, bizim ən böyük nailiyyətimizdir. Yaranmış yeni reallıq 30 il idi həllini gözləyən münaqişənin bütün regionun inkişafına maneə yaratdığı barədə uzun müddət təkrarlanan tezisin nə qədər əsaslı olduğunu bir daha nümayiş etdirir. Artıq tarixə çevrilmiş Ermənistan-Azərbaycan Dağlıq Qarabağ münaqişəsi Cənubi Qafqazın inkişafını tormozlayan, sülhə, sabitliyə təhdid kimi qiymətləndirilən düyünə çevrilmişdi. İndi bu düyün çözülüb. Region ölkələrinin əməkdaşlığı, qarşılıqlı faydalı əlaqələr zəncirinin qurulması üçün geniş imkanlar açılıb və bu, yalnız Azərbaycanın baxışı deyil, regionda maraqları olan bütün ölkələr bu yanaşmanı bölüşür.

Milli Məclisin deputatı qeyd edib ki, Ermənistan keçmişə ilişib qalmamalı, indiki reallığa uyğun gələcək fəaliyyət konsepsiyasını müəyyən etməlidir. Bu konsepsiyanın mütləq şərtlərindən biri qonşuların ərazi bütövlüyünə hörmət, əsassız iddia və ittihamlardan imtina etməkdir: “Prezident İlham Əliyev Moskva görüşündə bir daha bu məsələlərə toxundu, Azərbaycanın regionun inkişafı naminə əməkdaşlığa böyük maraq göstərdiyini qeyd etdi. Eyni zamanda, Ermənistanın siyasi elitasına da zəruri mesajlar verdi. Hesab edirəm ki, gələcəyə baxmaq üçün bu görüşdə əldə olunmuş razılaşmaların əhəmiyyəti olduqca yüksəkdir”.

Deputat bildirib ki, istənilən kontekstdə təhlil etdikdə üç ölkə rəhbərinin imzaladıqları yeni Bəyanat Azərbaycanın iqtisadi maraqlarına tam cavab verir. Sənəd Azərbaycanın əsas hissəsinin Naxçıvan Muxtar Respublikası ilə birbaşa əlaqəsini təmin etməklə yanaşı, region ölkələri üçün də yeni nəqliyyat-kommunikasiya imkanları yaradacaq. Bugünkü reallıqlar, dünyada və bölgədə gedən proseslər, bir çox ölkələrin qarşılaşdığı problemlər göstərir ki, indi ən optimal yol ən çətin şərtlərdə belə əməkdaşlıq imkanları tapmaqdır. Azərbaycan Prezidentinin həyata keçirdiyi siyasətin ən böyük uğurlarından biri bütün region ölkələrinə bu cür imkanı yaratmasındadır.

Xudaferin.eu

12:57