Diasporla İş üzrə Dövlət Komitəsi Azərbaycan Respublikası Prezidentinin cari il fevralın 1-də Azərbaycan Gənclər Gününə həsr olunmuş respublika toplantısında söylədiyi “Mənim də tövsiyəm ondan ibarətdir ki, gəncləri dövlət təşkilatları önə çəksinlər. Çünki gənclərin həm potensialı, həm fəallığı, həm də məsələlərə yeni baxışları cəmiyyət üçün çox lazımdır. Bütün dövlət təşkilatlarına tövsiyə etmişəm ki, könüllüləri cəlb etsinlər” fikirlərə əsaslanaraq “Diaspor könüllüləri” adlı yeni proqrama başlayır.

Xudaferin.eu xəbər verir ki, proqram çərçivəsində diaspor könüllüsü olmaq istəyən 18-29 yaş arası gənclər seçiləcəklər. Proqramda iştirak etmək arzusunda olanlar aprelin 10-dək Dövlət Komitəsinin rəsmi internet saytında (http://diaspor.gov.az/volunteers/) yerləşdirilmiş müvafiq formanı doldurmalıdırlar.

Müraciət edənlər içərisindən seçilmiş “Azərbaycan Diaspor Könüllüləri” 2 ay müddətində Dövlət Komitəsində Könüllülük proqramı keçəcəklər. Proqramın ilk iki həftəsi gənclərə könüllülük fəaliyyəti, diaspor, Azərbaycan diaspor hərəkatı haqqında ümumi məlumatlar veriləcək. Növbəti həftələrdə isə proqram ayrı-ayrı qruplar şəklində müvafiq struktur şöbələrində davam etdiriləcək. Proqramda tam iştirak etmiş gənclər Dövlət Komitəsinin sertifikatını alacaqlar.

Könüllülərin diaspor sahəsində dövlət siyasətinə ictimai dəstəyin təşkilində, yerli və beynəlxalq layihələrdə, diaspor gənclərinin müxtəlif ölkələrdə keçirdiyi tədbirlərdə və uyğun maarifləndirici aksiyalarda iştirak etməsi nəzərdə tutulur.

Xudaferin.eu