“Aqrolizinq” gübrə idxalını özəl sektora həvalə edəcək - AÇIQLAMA

“Aqrolizinq” Açıq Səhmdar Cəmiyyəti ölkəyə mineral gübrələrin gətirilməsi prosesini tədricən özəl sektora həvalə etmək və bu bazardan çəkilmək niyyətindədir. Bu fikirləri Azərbaycana gübrə idxal edən şirkətlərin nümayəndələri ilə görüşdə “Aqrolizinq” ASC-nin sədri Seymur Mövlayev deyib.

Xudaferin.eu xəbər verir ki, son günlər gübrə bazarında yaranan problemlər barədə danışan “Aqrolizinq” ASC-nin sədri bildirib ki, hazırda ölkəyə gübrə idxalının əksər hissəsini özəl şirkətlər həyata keçirir və “Aqrolizinq” güzəştli qiymətlərlə fermerlərə satdığı gübrəni əksər hallarda özəl şirkətlərdən alır. 

“Özəl şirkətlərin ölkəyə gübrə gətirməsində aktivlik göstərməməsi nəticə etibarilə müəyyən problemlərin yaranmasına gətirib çıxarır. Biz “Aqrolizinq” olaraq tədricən gübrə bazarını özəl şirkətlərin ixtiyarına verməyə hazırlaşırıq. Şirkətlərə göstərdiyimiz bu münasibət onların bazarda mövqelərini gücləndirmək üçün stimul rolunu oynamalıdır”.

Seymur Mövlayev “Aqrolizinq” xətti ilə gətirilən gübrənin qara bazarda baha satılması xəbərlərinə də münasibət bildirib. Onun sözlərinə görə, vətəndaşlardan “Çağrı Mərkəzi”mizə daxil olan müraciətlərin hamısı dərhal daxili nəzarət şöbəmizin əməkdaşları tərəfindən araşdırılır. Əksər hallarda məlum olur ki, vətəndaş “Aqrolizinq”dən 70 faiz güzəştlə aldığı gübrəni torpağa vermək əvəzinə anbarda saxlayır və bazarda tələbat artan zaman baha qiymətə satır. 

“Nəticə etibarilə cəmiyyətdə “Aqrolizinq” gübrəni fermerlərə güzəştli qiymətlərlə satmaq əvəzinə bazarda satdırır” kimi yanlış fikirlər formalaşır. Təəssüf ki, vətəndaşların gübrəni güzəştli qiymətlərlə alaraq, bazar qiymətinə satmasının qarşısını almaq üçün hər hansı bir mexanizm yoxdur”. 

Seymur Mövlayev hər il ölkədə mineral gübrələrə ehtiyacın artdığını nəzərə çatdırıb. Onun sözlərinə görə, “Aqrolizinq” tərəfindən Azərbaycana 2016-cı ildə 26,8 milyon manat dəyərində 73 min ton, 2017-ci ildə 44,4 milyon manat dəyərində 65,5 min ton, bu il isə 106,07 milyon manat dəyərində 175 min ton müxtəlif növ mineral gübrələrin gətirilməsi üçün müqavilələr bağlanıb. Bu günə kimi artıq 146 min ton gübrə gətirilərək fermerlərin müraciəti əsasında 70 faiz güzəştlə onlara təhvil verilib. Göründüyü kimi, tələbat hər il artır, bu səbəbdən bəzən ehtiyacların qarşılanmasında problemlərin yaranması təbiidir. 

“Amma yenə də qeyd etmək istəyirəm ki, “Aqrolizinq” bu bazarda tək deyil, bizimlə eyni zamanda gübrə bazarında özəl şirkətlər də var. Biz gübrə idxalı məsələsini tam şəkildə özəl şirkətlərə həvalə etməklə onların ölkəyə gübrə gətirilməsində marağını daha da artırmış olarıq”.

“Aqrolizinq” rəhbəri özəl şirkətlərin təkcə bu il ölkəyə 145,7 min ton gübrə idxalı həyata keçiridiyini açıqlayıb. Bildirib ki, gübrəyə olan tələbatın ödənilməsi üçün ölkəyə dövlət və özəl sektor xətti ilə kifayət qədər mineral gübrə gətirilib. Bu baxımdan gübrə çatışmazlığı ilə bağlı söhbətlərin ciddi əsası yoxdur. 

Araşdırmalar isə göstərir ki, bəzi hallarda fermerlər dövlətin gübrəni onlara pulsuz verməli olduğunu düşünürlər. Elə hallar da var ki, fermer güzəştli gübrə almaq üçün lazım olan sənədləri təqdim etmir. 

“Gübrənin güzəştli qiymətlərlə satılması üçün tələb olunan sənədlər var, bu sənədləri təqdim edən şəxslər heç bir problem olmadan dövlətin güzəşt siyasətindən yararlana bilərlər”.

Görüşdə Kənd Təsərrüfatı Nazirliyinin bitkiçilik şöbəsinin müdiri Rafail Quliyev çıxış edərək bildirib ki, fermerlərin güzəştli şərtlərlə gübrə ala bilməməsinin əsas səbəblərindən biri torpaq üzərində mülkiyyət hüququnu təsdiqləyən sənədlərinin olmamasıdır. O, fermerləri ilk növbədə tələb olunan sənədləri qaydaya salmağa, yalnız bundan sonra güzəştli gübrə almaq üçün “Aqrolizinq” ASC-yə müraciət etməyə çağırıb.

Xudaferin.eu

12:48